Mažeikėškēms – sutartės i paskaita aplink tarmės

Doc. Pabrieža Juzis lietuviu kalbuos tarmės palygėna su mēdė šakuom i šakeliem. STRAZDAUSKĖ Juonė portėgrapėjės

Mažėikiu Merkelė Račkauska gimnazijuo vyka aukštūju mokyklu mūgė, kuriuo dalyvāva i sāva veikla pristatiniejė pėnkiuolėka mokyklu. Mūgės meto tarp Mažėikiu rajuona savivaldybės i Šiauliū universiteta pasirašyta bendradarbiavėma sutartis.

Dėdėlė gimnazistu i muokytuoju diemesė sulaukė Šiauliū universiteta docėnta dāktara Pabriežas Juziaus paskaita aplink Lietuvuos tarmės i žemāičiu kālba.


Daug savū studėntu

Sutarti iš Mažėikiu posės pasirāšė Savivaldybės mėra pavadoujonti vicemėrė Bernotienė Sigotė, Šiauliū universitetou atstovāva rektuorios Jurgaitis Donats. Abėdvės posės įsipareiguojė bendradarbiautė vykdont pruojėktus, kvėistė vėinė kėtus i rėnginius, konkursus, keistėis informācija i daug vėsuokiū kėtū dalyku.
„Nieka keista i negaliejė būtė, ka čė raduom daug savū, tai yr tokiū, kurėi baigė mūsu universitėta, dėltuo esam laimingė, kad tokiū žmoniū čė daug, o Šiauliū universitėtė daugiau kāp posė žemaičiu, kėtė – lietovē. Aš tou džiaugous ir dar džiaugous, ka čė yr daug jaunėma, kuris tėkra studijous Šiauliū universitėtė ir papildys tas gretas, kuriuos jau i tēp gausės“, – kalbiejė rektuorios.
Studėnta mažeikėškēms paruodė nuotaikinga i grāžė progrāma.


Lietuva stipri tarmiem

Iš Skouda kėlės Pabrieža J. džiaugies, ka Mažėikiu gimnazijuo sutėka daug sava bovusiu studėntu, netgi tokiu, katruos studijava ka uns pėrma kārta baigės muokslus iējė i audituorėjė.
Svėtys primėnė, ka Vasarė 21yr Tarptautėnė gimtuosės kalbuos metā, o 2013-ėjē Seima paskelbtė Tarmiū metās. O gimtoji tarmie yr kāp gimtuoji kālba, ta išein, ka vasarė 21-uoji yra dvėgoba švėntė.
Pėrmuo sāva pasakuojėma dalie docėnts rokavuos bendrėnė kālba, o ontruo, kalbiedams aplink žemaičiu tarmė, – žemaitėška.
„Gimtuoji tarmie, gimtuoji kālba yr kėkvėinuos tautuos kultūras, vėsa bovėma pamatū pāmats, o žemaitē sāka – kertinis kūlis. Ir kėik mes tū gimtūjū tarmiū a kalbū torēm, tėik yr stipri Lietuva“, – sākė Pabrieža J.

Parašykite komentarą

El. pašto adresas nebus skelbiamas.

*