Bėrželė 30 d. Telšiū rajuonė, Degaatiūs, iškilmingaa atidėngs pamynklos Žemaitiu tautaa pagerbtė.
Pamynkla atidėngėma ceremuonėjee vadovava Degaatiu seniūns Kontrėms Untuons, katras i sugalvuojė tū pamynkla pastatytė. Seniūns papasakuojė, ka jau 3 metaa kaap een tas pareigas i tik pradiejės dėrbtė sugalvuojė pagerbtė Žemaitiu tauta i seniūnėjės gyventuojus, pastatydams Degaatiu parkelie dideli i graži akmini.
Tuo vėituo onkstiau bova medinis pamynklos, katras nu omžiaus supova. Elgaa ėiškuojė Untuons tuo akmėnėis. Bet čė bova tik pati pradė darba. Nupėrktė tou akmėni iš žemės, katruo ons bova sūrasts savinynka nebova sunkee, bet reikiejė anūn kažkaap pargabentė. Prireikė galingas teknikas, katro pasomdyė kaštava didelius pinyngus.
Bet žemaitee nebūtom žemaitęes, jego nemylietom sava krašta i nepalaikytom geruos mintėis. Akmėnėis parvežėma finansava Algerds i Danutė Marčę iš Nidas, katrėi yr kėlė iš Telšių krašta. Tujau atsirada gerū žmuoniū, katrėi nušlifava akmini r yškalė raidės. Tam pamačėjė UAB „Žemaitėjės paminklaa“, Juogmėna Stasiaus firma, Leščiauskis Sigis. Degaatiu seniunėjės žmuonis padiejė sutvarkytė aplinka.
Pamynkla atidėngėma ceremuonėjė prasidiejė nu švėntū mišių Degaatiu bažnytiuo. Mėšės laikė prelats dr. Šiurys Jūzaps. Pu mišiū vėsa koluona su Žemaitėjės vieliavuomis atžygiava pri pamynkla, kor iškilmingas kalbas pasakė Kontrėms Untuons, prelats Šiurys, Žemaitiu kultūras draugėjės prėzidėnts Kasparavičios Stanisluovs.
Pamynkla atidengė Algerds i Danutė Marčę. Puškuorę ta pruoga iššavė tris salvės iš patranku. Viėliau ŽKD prėzidėnts suteikė Žemaitėjės garbies pilieiu titulus Kišuonou Adolpiou, katras daug metu rūpinuos Degaiatiu parko i Zvonkuviene Jenee už Degaatiu varda garsėnėma.
I pamynkla Žemaitėjės tautaa atidaryma pagerbėma iš Mažėikiu atbildiejė Žemaitėjės baikeręe – 15 motuocėklu. Poikos bova uors i poiki šventė. Vėsė pasidžiaugiem tou, ką yr da žmoniū Žemaitijuo, katrėj myl sava krašta i atsimėn sava šaknis, gerb sava pruotievius. Tokiū žmoniū dieka i gyvou Žemaitėjė.
GRĖCIOS Gyntars